LOU RAMPÈU

Sian mai que d’uno e mai que d’un, sian tant e puei mai que si lou pensan e que si l’esprouvan : aquéu sistèmo es acaba. Em’oucò, nouàstei crido soun esparpaiado, nouàstei rampèu soun dessepara, nouàsteis acien embrenigado. Talamen que, de còup que l’a, doutan de nouàstei fouarço, avanissèn souto leis ànci d’èstre despoudera. Ato ! tant aquelo miraiado pouarto pèiro, sènso lei centralisacien e, vai soulet, lei bedigarié. Li fa rèn : nous fa besoun de si federa. De-segur mai que mai quouro uno crìsi ecounoumico, soucialo e poulitico, si rounso, vioulènto, sènso màncou s’escoundre, grandarasso e duro. S’un còup « sian en guerro », ato puei es uno guerro soucialo. Tre aro agarrisson sènso branda : meton l’emplé souto barat, gansaion lei dre e lei liberta, fan de messonjo e de vioulènci d’Estat, assajon d’espauruga lou mounde e la pouliço repremisse lei countèsto subretout dins lei quartié poupulàri, espinchon de pertout, lei fiòli an la croio, fan de descreminacien racisto, traton d’un biais endignous lei paure, lei pas gaiard, leis eisila. L’a sèmpre que mai de gènt que si capiton dins un estamen qu’es uno grosso catastrofo raport à l’oustau, à la santa, au manja. Es mai que tèms de revira l’escorno que serto pèr terceja : acò « estreme », es d’inegalita terriblo que la crìsi buto mai piègi ; acò « estreme », es aquelo vioulènci. Dins aquéu sistèmo d’aqui, nouàstei vido coumtaran sèmpre mens que soun gasan.

Avèn plus crento de dire nouaste franc valentin sus d’aquelo vido vidanto que nouàstei soucieta li soun oupremido. De longo de desenau d’annado, « capitalisme » s’èro endevengu uno paraulo que la foulié pas dire, forço fourçado e sènso autro chausido, qu’anavo soulet coumo l’èr qu’alenan, un èr sèmpre que mai enfecious. Devistan desenant de quant lou « capitaloucène » si capito d’èstre uno pountannado de destrùssi e de cerco-la-mouart, de blessaduro facho à la Terro em’à la vido. Es pas lou tout de coumbatre un liberalisme nòu pèr retourna à-n-un capitalisme que si poudrié aceta, metèn « verd » o « souciau » o « refourma ». Lou capitalisme es ferouge e lou poudèn pas mestreja, emenda o meiouri. Pòu chucha tout, tau coumo un vampire vo un trau negre. A gié de mouralo, saup faire que l’empèri e lou gousto-soulet. A degun autre princìpi qu’aquéu dóu proufié. Aquelo micanico d’empasso-tout s’endevèn mourtalo sènso vergougno, coumo tout proudutivisme sènso tanco. De si federa, es faire responso tóuti coutrìo contro aquelo micanico, si fa vèire noumbrous e s’encarga clar de li faire lou contro, sènso jamai si figura de s’acoumouda em’elo.

Pamens, sian ni soulamen nimai proumié, de gènt « contro ». S’avèn pas de soulucien touto facho, sian que mai espés qu’oubrejan de tèsto e dei man pèr trouva d’àutrei camin. De camin que si li poudèn fisa e que lei poudèn chaspa dins de vido umano. Nous fa besoun de lei parteja. Es puei acò qu’assèmblo aquélis esperiènci em’aquélis esperanço : lou coumun founda noun pas que sus la prouprieta mai subre l’usàgi, la justiço soucialo e la digneta egalo. Lei coumun, es lou dequé, es d’agi ensemblamen, es de biai de viéure. Permeton d’espera uno bouano vido emé d’osco nouvello : noun plus lou marcat mai lou parteja, noun plus la councurrènci mai l’entre-ajudo, noun plus la bataio pèr gagna mai lou coumun. Aquéli prepausicien tènon bèn dre. Nous pourgisson un biai diferènt de vèire lou mounde, desembruti de la courso pèr lou gasan, dei liame pèr interès e d’un tèms que dèu rapourta. Es encamai necite e precious, aro, de lei parteja, de lei discuti, de leis espandi.

Sabèn proun qu’acò bastara pas. Sian counsciènt que lou pouderous capitau leissara jamai s’estigança pàsi-pàsi uno forço rejouncho que li fa lou contro. Sabèn lou necite de s’afrounta. Quicho d’autant mai de s’ourganisa, de tèisse de liame e de s’entre-ajuda, dins soun endré e tambèn à l’internaciounau. Pèr recampa lei forço, pacientous e testard, nous fai besoun de s’ourganisa entre nautrei, segound lou princìpi de l’autounoumié. Acò vau dire de rèndre poupulàri tóuti lei biai de demoucracìo vertadiero : colo d’entre-ajudo tau coumo an creissu à bèl èime dins lei quartié poupulàri, assemblado, couperativo coumpleto, coumita d’acien e de decisien mounte travaian e mounte vivèn, relarg d’apara, coumuno libro, coumunauta critico, messo en coumun dei mejan de prouducien, dei servìci e dei bèn. Aquéli que travaion à sougna lou mounde baton vuei lou rampèu pèr que lou pople si boulegue. La toco n’es tant pouderouso que simplasso : aquéli que, cade jou, obron pèr sougna soun aquéli que sabon, coutrìo ‘mé lei malaut, lou necite pèr la santa publico. Miés que lei « manager » e lei censamen « espert ». Aquelo idèio si pòu generalisa. Avèn touto legitimeta e touto capacita pèr decida de nouàstei vido emai de ce que nous fa besoun : de s’ourganisa entre nautre es un biai de s’empatrouna de ce que nous regardo. De si federa es countrista lou poudé.

Regardan pas lou passat coumo un brèu religious. Mai si ramentan de ce qu’èron lei Federa, aquéli que an vougu, de-bouon, cambia la vido, li douna de sèn emai de forço souto la Coumuno de Paris. Avien de groupamen, de poun de visto e de counvicien diferènto, republican, marxisto, libertàri, emai de fes que l’a tout acò en mume tèms. Avien pamens un couràgi parié e un « salut coumun ». Coumo éli, poudèn trespassa nouàstei diferènci fàci à l’urgènci grèvo. Uno couperativo pèr estigança d’acien rendrié mai pouderous nouàstei biai de faire, que lei partejarian. Un escàmbi à la franco margarido vo uno forço ourganisado ? Es nautre que n’en decidaren. Fàci ei dicho douminarello, enganivo em’estirado dins tóuti lei caire, nous fa besoun de s’alia, pèr lei countrista noun pas que de lei fa cala. Nous fa besoun de si federa pèr dorbi lou tai d’uno chausido soulido que doune d’espèr.

Tre lei proumiérei forço rassemblado, ourganisaren un rescontre que n’en decidaren ensèmble, osco seguro, lou biai de lou teni.

    * Ces champs sont requis pour souscrire